ខ្សែក្រវាត់ពិសេស អាច​អោយ​អ្នក​សាក​ថ្ម​ស្មាត​ហ្វូន​តាម​ខ្លួន​បាន​គ្រប់​ពេល​វេលា និងគ្រប់ទីកន្លែង!

យើងធ្លាប់តែឃើញឧបករណ៍​សាក​ថ្ម​ស្មាត​ហ្វូន​ជា​លក្ខណៈ Power Bank ហើយ​វា​បាន​ជួយ​ទៅ​ដល់​ការ​ប្រើប្រាស់​ស្មាត​ហ្វូន​របស់​យើង​បាន​យ៉ាង​ច្រើន ​នៅ​ពេល​ធ្វើ​ដំ​នើរ​ទៅ​កាន់​ទីឆ្ងាយ ឬ​តំបន់​គ្មាន​ប្រភព​អគ្គីសនី​ជាដើម តែវា​ក៏​មាន​គុណវិបត្តិ​ផង​ដែរ ដោយ​វា​រញ៉េរញ៉ៃ​នៅ​ពេល​យក​តាម​ខ្លួន​ដែល​ប្រៀប​បាន​ទៅ​នឹង​ស្មាតហ្វូន​មួយ​ ទៀត​ទៅ​ហើយ ដូច្នេះ​អ្នក​ប្រើ​ប្រាស់ Power Bank គឺ​ហាក់​ដូច​ជា​យក​ស្មាត​ហ្វូន 2 គ្រឿង​តាម​ខ្លួន​អញ្ចឹង​ដែរ។ យ៉ា​ងណា​មិញ​សម្រាប់​ថ្ងៃ​អនា​គត​ដ៏​ខ្លី​ខាង​មុខ​នេះ យើង​នឹង​ឃើញ​មាន​ឧបករណ៍​ពិ​សេស​ថ្មី​មួយ​ផ្សេង​ទៀត ដែល​ជា​កា​រកែ​ច្នៃ​ប្រឌិត​ដ៏​ថ្មី​ស្រឡាង​របស់​ក្រុម Nifty សម្រាប់​ជួយ​ទៅ​ដល់​ការ​សាក​ថ្ម​ស្មាត​ហ្វូន​របស់​យើង​ទាំង​អស់​គ្នា​អោយ​ បាន​កាន់​តែ​ប្រសើរ និង​មាន​ភាព​ងាយ​ស្រួល ដោយ​ពុំ​ចាំបាច់​យក​ឧ​បករណ៍​ផ្សេងៗ​តាម​ខ្លួន​នាំតែ​រញ៉េរញ៉ៃ​ឡើយ។

ឧបករណ៍ថ្មី ដែលនឹងត្រៀមបង្ហាញខ្លួននា​ថ្ងៃ​អនាគត​ដ៏​ខ្លី​នោះ​គឺ​ខ្សែ​ក្រវាត់​ពិសេស ដែល​វា​មានតួ​នាទី​ជា​ខ្សែ​ក្រ​វ៉ាត់​ផង និង​ជា​ប្រភព​ភ្លើង​សម្រាប់​អោយ​យើង​ធ្វើ​ការ​សាក​ថ្ម​ស្មាត​ហ្វូន​បាន​យ៉ាង ​ប្រសើរ និង​ងាយ​ស្រួល​បំផុត។ គំនិត​កែ​ច្នៃ​ខ្សែ​ក្រវ៉ាត់​ពី​សេស​នេះ​ឡើងគឺ​ដើម្បី​កាត់​បន្ថយ​ការ​យក​ ឧបករណ៍​តាម​ខ្លួន ព្រោះ​ខ្សែក្រវ៉ាត់​ត្រូវបាន​យកទៅ​ប្រើ​ប្រាស់​រាល់​ថ្ងៃពី​សំណាក់​មនុស្ស​ ទូទាំង​ពិភពលោក ដូច្នេះ​ហើយ​ទើប​បាន​ជាក្រុម Nifty បាន​ធ្វើ​ការ​បង្កើត​គម្រោង​ផលិត​ខ្សែក្រវ៉ាត់ Xoo ចេញ​មក​ដោយ​ពាក់​នៅ​ជាប់​នឹង​ខ្លួន​មនុស្ស​ស្រាប់ ហើយ​ថែម​ទាំង​អាច​សាកថ្ម​ទៅ​កាន់​ស្មាតហ្វូន​បាន​យ៉ាង​ប្រសើ​រថែម​ទៀត​ផង ដែល​នេះ​ពិត​ជា​មាន​ភាព​ងាយ​ស្រួល​ខ្លាំង​ណាស់​ទៅ​ដល់​ការ​ប្រើ​ប្រាស់​ ស្មាត​ហ្វូន​មិនថា iPhone ឬ​ស្មាត​ហ្វូន Android ឡើយ។ 

 ពាក់ព័ន្ធនឹងការផលិតខ្សែក្រវ៉ាត់​ទំនើប​មួយ​នេះ​គឺ​មិន​មែន​ជា​រឿង​ងាយ​ ស្រួល​ឡើយ គឺ​ត​ម្រូវ​អោយ​មាន​ក្រុម​អ្នក​ជំនាញ​ជា​ច្រើន​មករួម​គំនិត​គ្នា ដើម្បី​ផលិត​អោយ​បាន​ចេញ​ជា​រូបរាង និង​ប្រើ​ប្រាស់​បច្ចេក​វិទ្យា​ពិសេស​ក្នុង​ការ​ផ្ទុក​កម្លាំង​ថ្ម​នៅ​ក្នុង ​នោះ ដោយ​ប្រើប្រាស់​ថ្ម​ពិសេស​ម្យ៉ាង​ឈ្មោះ Lithium Ceramic Polymer Flexible Battery អាច​ធ្វើ​ការ​បត់​បែន​តាម​ខ្សែ​ក្រវ៉ាត់​បាន រួម​ទាំង​គុណភាព និង​ប្រព័ន្ធ​ការពារ​សុវត្ថិ​ភាព​ផង​ដែរ។ ខ្សែ​ក្រវ៉ាត់ Xoo មាន​ទម្ងន់​ដូច​ទៅ​នឹង​ខ្សែ​ក្រវ៉ាត់​មាន​លក់​នៅ​តាម​ទីផ្សារ​ផងដែរ ដោយ​ខ្សែវា​ត្រូវ​បាន​ផលិត​ចេញ​ពី​ជ័រ​ស្វិត​គុណភាព​ខ្ពស់ (តែ​មិន​ដល់​ខ្សែ​ក្រវ៉ាត់​ផលិត​ចេញ​ពី​ស្បែក​សត្វ​ឡើយ) ក៏ដូច​ជា​កម្លាំង​ថ្ម 2100mAh អាច​ធ្វើការ​សាកថ្ម​ស្មាតហ្វូន​បាន​គួរសម តាម​រយៈ​ឌុយ USB បង្កប់​មក​ជា​មួយ​ខ្សែ​ក្រវ៉ាត់​ស្រាប់។ ដោយ​យោង​តាម​ក្រុម​ផលិត Nifty បាន​ប្រាប់​អោយ​ដឹង​ថា​បើ​សាកថ្ម iPhone 6 ចាប់ពីថ្ម 0% រហូត​ដល់ 100% គឺ​ចំនាយ​ពេល 2 ម៉ោង​កន្លះ។ 

 

+នៅពេលអ្នកប្រើប្រាស់ខ្សែក្រវ៉ាត់នេះ​សាក​ថ្ម​ទៅ​កាន់​ស្មាត​ហ្វូន​អស់ អ្នក​តម្រូវ​អោយ​ធ្វើ​ការ​សាក​ថ្ម​ខ្សែ​ក្រវ៉ាត់​នេះ​ដូច​ធ្វើ​ការ​សាក​ថ្ម​ ទូរស័ព្ទ​ផងដែរ ដែល​មាន​គ្រាប់ LED សម្រាប់​បញ្ជាក់​ប្រាប់​ថា​សាកថ្ម​ពេញ ឬ​មិន​ទាន់​ពេញ​នៅ​លើ​ក្បាល​ខ្សែក្រវ៉ាត់។ ទោះ​បី​ជា​យ៉ាង​ណា​ក៏​ដោយ​ខ្សែ​ក្រវ៉ាត់ Xoo នា​ពេល​បច្ចុប្បន្ន​នៅ​មិនទាន់​បាន​ប្រកាស​ចេញ​លក់​ជាផ្លូវ​ការ​នៅ​ឡើយ​ នោះទេ ព្រោះ​វា​កំពុង​ស្ថិត​នៅ​ក្រោម​ការ​ផលិត និង​រៃ​អង្គាស​ថវិកា​ពី​មហាជន ដោយ​គោល​បំណង​ប្រមូល​យក​ប្រាក់ 50000$ ដើម្បី​ចាប់​ផ្ដើមផលិត ហើយ​នៅ​ពេល​វា​ចេញ​លក់​គឺ Xoo មាន​តម្លៃ​ប្រហែលជា 150$ ប៉ុណ្ណោះ។  

ប្រភពៈ​ DigitalTrend

ដោយៈ​​ BenYamin

11:35am 22 វិច្ឆិកា